BU GÜN RÖYANIN TOYUDUR

Röya Ayxan: “Mən xoşbəxtəm və hamıya belə sevgi arzu edirəm”

Hazırda şou aləminin ən tanınmış siması olan və yumşaq ifası ilə özünə ən çox dinləyici toplayan Röya Ayxan bu gün ərə gedir. Müğənni iki ildir eşq macərası yaşadığı sevgilisi Anar Cəlilovla nəhayət ki, bu gün rəsmi şəkildə, el adəti ilə toy çaldırıb ər-arvad elan olunacaq.
İndiyə qədər toyun gah Avropa ölkələrinin birinda, gah da Bakıdakı “Yaxt-klub”da keçiriləcəyi haqda yayılan söz-söhbətə də aydınlıq gəlib. Müğənninin mətbuat katibi Ülviyyə Alovlunun verdiyi məlumata görə, toy “Sarı gəlin” şadlıq evində keçiriləcək. Ü.Alovlu deyib ki, toya xarici müğənnilərdən kimsə dəvət olunmayıb: “Doğrudur, Röyanın xaricdən - Rusiyadan, Avropadan, Türkiyədən olan dostları bu toyda iştirak etməlidir. Lakin xaricdən heç bir müğənni dəvət olunmayıb, Röyanın yerli sənətçi dostlarından isə xeyli dəvətlilər var. İnşallah, toy başa çatandan sonra Röyanın pərəstişkarlarına şənlik barədə məlumat verərik”.
Yəqin ki, Röyanın sevgilisi ilə - “Çudo-peçka” mağazalar şəbəkəsinin sahibi Çingiz Cəlilovun oğlu Anarla ilk tanışlığının harada və necə baş verməsi onun pərəstişkarları üçün də maraqlı olar. Odur ki, toy məqamında bu tarixçəni müğənnini sevənlərin nəzərinə Röyanın öz dilindən çatdırırıq: “Həmişəki kimi, mən şou-proqramda iştirak etmək üçün restorana getmişdim. Həftəarası olduğu üçün restoranda çox az adam vardı. Çıxışımdan sonra rəfiqələrimlə bir yerdə oturmuşduq. Bu vaxt lirik bir musiqi çalındı və mən həzin musiqinin sədaları altında xəyala daldım. Başımı qaldıranda qarşımda məni rəqsə dəvət edən bir şəxsi gördüm. Nədənsə bu nəzakətli təklif mənə xoş gəldi və onunla rəqs etdim. Rəqs bitəndən sonra hərəmiz öz masamızda əyləşdik. Məni təəccübləndirən bu idi ki, başqalarından fərqli olaraq o oğlan məndən heç telefon nömrəmi də istəmədi. Bundan sonra bütün şou-proqramlarda, toylarda gözüm adını belə bilmədiyim həmin oğlanı axtarırdı. 7 aydan sonra bir məclisdə təsadüfən yenə görüşdük. Bu dəfə onu itirmək istəmirdim və biz yaxından tanış olduq. Mən indi çox xoşbəxtəm və hamıya belə sevgi arzulayıram”.
Bu gün toy həyəcanı yaşayan müğənniyə “Yeni Müsavat” olaraq biz də xoşbəxtlik arzu edirik.

NİGAR