GUNUN XEBERI - Dekabr 13, 2006

Hərbi xidmətə çağırış qaydalarında dəyişiklik edilir


Bu gün Milli Məclisin Müdafiə və təhlükəsizlik məsələləri daimi komissiyasının iclası keçirilib. Komissiyanın üzvü Zahid Orucun APA-ya verdiyi məlumata görə, iclasda “Hərbi qanunvericiliyin əsasları haqqında” qanuna dəyişikliklər müzakirə olunub.

Dəyişilməsi təklif olunan birinci məsələ hərbi xidmətə çağırış müddətinin ildə dörd dəfə keçirilməsi və 20 günlük çağırışın 30 günə qədər uzadılması ilə bağlı olub. İkinci dəyişiklik birinci və ikinci qrup əlil valideyni və himayəsində bir övladı olan çağırışçıların möhlət hüquq ilə bağlı olub. Z. Oruc deyib ki, bu vaxta qədər bu kateqoriyalı çağırışçıların möhlət hüququ olsa da, indi ikinci qrup əlillərə möhlət hüququ ləğv olunur, yalnız birinci qrup əlillərin belə hüququ saxlanılır. Üçüncü dəyişiklik bu vaxta qədər himayəsində üç uşağı olan çağırışçıların da möhlət hüququnun ləğvi ilə bağlıdır. Dördüncü dəyişiklik isə ali təhsilli şəxslərlə sıravi vətəndaşlar arasında xidmət müddətindəki fərqin aradan qaldırılması ilə bağlıdır. Belə ki, ali təhsilli şəxslər də 18 ay xidmət edəcəklər. Z. Orucun sözlərinə görə, daha bir dəyişiklik bakalavr pilləsini bitirəndən sonra magistraturaya, sonrakı dövrdə isə aspiranturaya sənəd verən çağırışçılarla bağlıdır. Qeyd olunub ki, bu məsələ müvafiq icra hakimiyyəti orqanının hərbi komissarlığa təqdim etdiyi siyahı əsasında həllini tapır. Yəni yalnız müvafiq icra hakimiyyətinin təqdim etdiyi siyahıda adı olan şəxslərə möhlət hüququ veriləcək /APA/