GUNUN XEBERI - Dekabr 12, 2006

ABŞ prezidenti Corc Buş: “Amerika Birləşmiş Ştatları Azərbaycanın ərazi bütövlüyünü dəstəkləyir”

Azərbaycanın ABŞ-da fövqəladə və səlahiyyətli səfiri Yaşar Əliyev öz etimadnaməsini ABŞ prezidenti Corc Buşa təqdim edib.

APA-nın “AzərTAC” Dövlət İnformasiya Agentliyinə istinadən yaydığı məlumata görə, Prezident Corc Buşun, Ağ evin protokol xidməti rəsmilərinin, Vaşinqtondakı diplomatik korpusa qoşulan digər doqquz ölkənin yeni səfirlərinin iştirak etdiyi tədbirdə səfir Yaşar Əliyev ABŞ-la tərəfdaşlığın Azərbaycanda yüksək qiymətləndirildiyini bildirib. “Biz suveren dövlətimizin qurulması və möhkəmləndirilməsi səylərimizdə ABŞ-ın dəstəyini həmişə hiss etmişik. Azərbaycan prezidenti İlham Əliyev bu ilin aprelində Ağ evdə olarkən xalqlarımızın eyni dəyərləri bölüşdüyünü vurğulayıb”. Səfir Yaşar Əliyev ATƏT-in Minsk Qrupunun həmsədr ölkəsi və dünyanın superdövləti kimi Birləşmiş Ştatların Ermənistan-Azərbaycan, Dağlıq Qarabağ münaqişəsinin ədalətli və uzunmüddətli həllinə çalışacağına əminliyini vurğulayıb. Yeni səfiri Vaşinqtonda salamlamaqdan məmnunluq duyduğunu bildirən ABŞ prezidenti Corc Buş ölkəsinin Azərbaycanla dostluğunu yüksək qiymətləndirdiyini deyib. “Bakı-Tiflis-Ceyhan kəmərindən gələn gəlirlərin şəffaf şəkildə paylanmasını təmin etmək üçün Dövlət Neft Fondu yaradan Azərbaycan digər zəngin resurslu ölkələrə nümunə ola bilər. Ölkənizin Avropaya enerji dəhlizində təchizatçı və tranzit dövlət kimi rolunun artacağına inanıram. Biz Azərbaycanda aparılan iqtisadi və siyasi islahatlarını dəstəkləyirik”. Terrorizmə qarşı mübarizədə Azərbaycanın mühüm rolunu vurğulayan Corc Buş ölkəmizi ABŞ-ın “möhkəm tərəfdaşı” adlandırıb. “Azərbaycanın gələcəyi Avroatlantik icma ilədir və ABŞ Azərbaycanın NATO və Avropa İttifaqı ilə yaxın əlaqələrini inkişaf etdirmək səylərini dəstəkləyəcək”. Azərbaycanla Ermənistan arasındakı münaqişənin Cənubi Qafqazın sabitliyini pozmaqda davam etdiyini vurğulayan ABŞ dövlət başçısı tərəfləri münaqişəni yalnız sülh yolu ilə həll etməyə, həmçinin Azərbaycan və Ermənistan xalqları arasında etimad quracaq yollar axtarmağa çağırıb. “Amerika Birləşmiş Ştatları Azərbaycanın ərazi bütövlüyünü dəstəkləyir. ATƏT-in Minsk Qrupunun üç həmsədrindən biri kimi biz Rusiya və Fransa ilə birgə sizin liderlərlə münaqişənin tezliklə və sülh yolu ilə nizama salınması sahəsində işimizi davam etdirəcəyik”. /APA/