Gunun, KISHIDI BU, Xeberi - Dekabr 12, 2006

Səudiyyə Ərəbistanın mədəniyyət və informasiya naziri İyad Mədəni: “Biz Livan deyilik ki, ermənilərin tərəfini saxlayaq”

“Səudiyyə Ərəbistanında Azərbaycanla Ermənistan arasındakı münasibətlər və işğal altında olan ərazilərinizdə dağıdılan mədəni abidələriniz barədə geniş məlumata malikdirlər. Azərbaycanın Səudiyyə Ərəbistanındakı səfiri bütün məsul şəxslərlə görüşlərində bu problemi onların diqqətinə çatdırır”.

APA-nın məlumatına görə, bu açıqlamanı jurnalistlərə Səudiyyə Ərəbistanın ölkəmizdə səfərdə olan mədəniyyət və informasiya naziri İyad Mədəni verib. Nazirin sözlərinə görə, Səudiyyə Ərəbistanının kütləvi informasiya vasitələrində Azərbaycanla Ermənistan arasında münaqişənin həlli istiqamətində atılan addımlar barədə məlumatlar öz əksini tapır: “Səudiyyə Ərəbistanının Azərbaycandakı səfiri də bu məsələni çox yaxından izləyir və müəyyən addımlar atır. Ölkəmiz bütün beynəlxalq təşkilatlarda və forumlarda Azərbaycanın bu haqq işini dəstəkləyir. Səudiyyə Ərəbistanı Livan deyil ki, ermənilərin tərəfində olsun”. /APA/