«20 yanvar»ı sökürlər

Dörd ay əvvəl inşasına başlayan körpünün sökülməsinə qərar verilib Dünən “20 yanvar” metrostansiyasının yaxınlığında tikilən körpünün söküldüyü barədə məlumat aldıq. Məlumatda qeyd olunur ki, Almaniyadan dəvət edilmiş mütəxəssislər bizim körpü tikənlərin “məharətlərinə” heyran qalıblar.
Belə ki, tikinti ilə tanış olmaq üçün əraziyə gələn almanlar öncə layihə ilə maraqlanıblar. Lakin onlara cavab olaraq bildiriblər ki, layihə yoxdur.

Təbii ki, bu əcnəbiləri daha da təccübləndirib. Bunun ardınca sual ünvanlayıblar ki, sizin məqsədiniz nədir? Yəni, yolu genişləndirmək istəyirsiniz, yoxsa nəzərdə başqa şey tutulub. Cavab olaraq deyiblər ki, onların məqsədi yolu genişləndirməkdir. Bu cavabdan sonra onlar bizim mahir “mütəxəssislərə” başa salmağa çalışıblar ki, “20 yanvar” dairəsinin üzərində körpü tikməklə vəziyyəti daha da çətinləşdirirlər. Çünki əgər, körpü tikilsə, onda “20 yanvar” dairəsi bağlanacaq.

Digər tərəfdən əvvəllər körpü olmadan üç və ya dörd maşın bir xətdən istifadə edə bilirdisə, inşaat başa çatandan sonra bu mümkün olmayacaq. Çünki körpünün bir xəttində yalnız iki maşın yanaşı hərəkət edə bilər. Eyni zamanda dairənin bağlanması maşınların Biləcəri qəsəbəsi istiqamətinə hərəkət etməsilə nəticələnəcək. Biləcəri qəsəbəsinə gedən yolda isə yalnız bir xətt var. Bu da tıxacların əvvəlkindən daha dəhşətli formada yaranmasına gətirib çıxaracaq. Almanlar vurğulayıblar ki, “20 yanvar” dairəsində hərəkət imkanlarının genişləndirilməsi üçün normal olaraq tuneldən istifadə etmək lazımdır. Əcnəbi mütəxəssislərin bu iradları Azərbaycan hakimiyyətinin səlahiyyətli şəxslərinə çatdırdıqları da qeyd olunur. Bundan sonra isə “20 yanvar”da körpü tikintisi dayandırılıb.

Yaxın günlərdə ərazinin beton dirəklərdən təmizlənəcəyi bildirilir. Yüz minlərlə dolların xərclənməsi bahasına quraşdırılmış dirəklər və qurğular yenidən sökülür. Bunun ardınca körpü həvəskarlarının tunel tikməyə başlayacaqları barədə məlumat var.